Melvin Tinker

Melvin Tinker-a lehkhabu ziah TALES OF THE UNEXPECTED (The Subversive Stories of Jesus) hi Kolkata-a lehkhabu dawr lian pakhat Landmark atangin hman deuh tawhah khan ka lei a. Chhiar lohvin rei tak ka dah ta reng a. Lehkhabu lian lo tak, phek 144 chauhva chhah anih avangin ka lehkhabu dahna a lehkhabu dang zingah a lo inzep bo hman titih deuh tawh nghe nghe a. Tlem lai deuhva UNDP programme ah Delhi a ka kal tumin lehkhabu te lam deuh ken tur ka dapkhawmna lamah ka haichhuak a. A chhah lo viau na a, ka zin chhungin ka chhiar zo hman lo deuhva. Aizawla ka haw leh hnuin Pathianni zan inkhawm banah ka chhiar zo ta vek a.     

Ziaktu ropui a nihna bakah 1994 atanga St John Newland-a Vicar rawngbawlna dinhmun pawimawh tak chelhtu, Oxford University atanga Pathian Thu (Theology) zirchhuak, nemngheh rawngbawlna atana Wycliffe Hall atanga training chhuak — Wetherby Parish Church-a Curate hna lo chelh tawhtu, Keele University-a Chaplain hna lo thawk tawh leh All Hallows, Cheadle-a Vicar nihna lo chelh tawh Melvin Tinker-a thuziak ka chhiar hmasak ber chu Evangelical Theologian hovin Theory of Evolution an thlirdan kawng khat chungchang Journal pakhat EVANGELICALS NOW tih a a ziahna — No Conflict tih a ni.

TALES OF THE UNEXPECTED tih lehkhabu hi thlirna hrang hrang atanga Lal Isua tehkhin thu thenkhat zir zauna a ni ber a. A Sub-Tiltle pakhat zawk pawh The Power of Jesus’ Parables tih a ni nghe nghe a. A Chapter hmasa ber hming chu The Power of Parables tih a ni.

Sawi zau vak ngai pawhin ka hre lo — Melvin Tinker-a thuziak dan style leh a approach hi ka ngainat zawng tak a ni a. Chuvang chu a ni mahna, ka bookshelf ka han en a, hetia han thlir puat ringawt pawhin Tinker-a thuziak ka han hmuh mai theihte chu — Faith and Miracles, Reading the Bible as Literature-The Implications of Structuralism, Towards an Evangelical Ecclesiology leh Battle for the Mind tihte an ni a. Heng bak pawhin ka la kawl nualin ka inhria.

Chuck Swindoll

Shillong-a lehkha kan zir laiin Charles R. Swindoll-a hi a lehkhabu ziakte atangin ka lo hmelhriat tawh a. Encourage Me, For Those Who Hurt, Dropping Your Guard, Living on the Ragged Edge tih angte kha ka chhiar ve nasa thin a. Shillong-a OM Book Store hawnna inkhawmah khatih hunlaia Shillong Mizo Kohhran a kan puipa pawimawh Upa Prof. C. Nunthara leh Upa Dr. P. C. Biaksiama te nen kan pathuma kan va kal ho tham tham tuma ka lei ve Killing Giants, Pulling Thorns tihte khan ka nunah nasa takin awmzia a nei fo thin. Ka sangawizawnpui Pu Ramenga'n ka chhiar ve atana a it avanga min pek Strike the Original Match tih lehkhabu te hlei hlei kha tunhnua kawppui ka han neih ve tak hnu hian a lo hlutzia ka hrechhuak thar leh thin.

Chuck Swindoll-a lehkhabu zingah chuan tunhnu thleng pawha ka la thlah theih loh — chhiar tawh hnu nimahse vawi tam ka bihchhuah nawn leh tawh (kan khum bula ka dah reng thin lehkhabu thenkhat zinga mi), ka ngainatna chuai thei reng reng lo chu Come Before Winter and Share My Hope tih leh Growing Strong in the Seasons of Life tihte hi an ni.